Турғут Уяр

ТУРҒУТ УЯР

 (1927-1985)

ҳаммасидан озроқ қолади

дейишади одамлар

тўғри гап

идишда бир чимдим қаҳва

қутида ноннинг увоғи

инсонда озгина изтироб. 

***

ёлғиз қолганингда

эслаб соғинсанг

демак, севмабсан.

ёдингга тушсаю бир онда

ёлғизланиб қолсанг

демак, севибсан.

***

ҳа баҳор эшик қоқар, биламан

настаринлар очилади, биламан

гилослар ҳам қизаради яқинда

яхши ният қилмоқ керак, биламан

азизам, буларнинг барини биламан

бироқ мени кечир...

***

шамол тегирмони нега айланар?

мен Дон Кихот бўлсайдим, шуни ўйлардим.

аммо мен, мен бўлиб шамол тегирмонига айлансам,

иллоки, Дон Кихотни севардим.

***

тўхтаб қолган соат – юрагим,

сени кўрсатади миллари, доим.

***

балки сири шудир: асл усталик

ҳар доим ҳаваскор бўлиб қолмоқлик.

/ М.Юлдашев таржимаси