Ё дарвеш... I

Ё ДАРВЕШ...

I

Ё Раббано хайр айла, Муҳаммадга ёр айла...

- Қалб ҳам синадими? - сўради Огоҳ.

- Синиш ҳам гапми, чилпарчин бўлиб кетиши мумкин! - деди дарвеш. - Аммо тош зарбидан эмас, ё товуш таъсиридан, ё сўз оҳангидан.

***

- Қандай дуо қилсам, Оллоҳ даргоҳида қабул бўлади? - сўради Огоҳ.

- Қуруқ дуо қилишни қўй! - деди дарвеш. - Мева олишни истаган дарахт экади.

***

- Қурбoн байрами қачон бўлади? - сўради Огоҳ.

- Ҳақиқий қурбон байрами қиёмат кунида бўлади! - деди дарвеш. - Мўминлар базмгоҳга киради, ҳўкизлар кушхонага.

***

- Қушда қанот бору нега инсонда йўқ? - сўради Огоҳ.

- Инсоннинг қаноти қаноатидадир! - деди дарвеш. - Қаноат инсонни қушлар етиб боролмайдиган юксакликларга олиб чиқади.

***

- Илоҳий ишқ недир? - сўради Огоҳ.

- Мавлонодан эшит: “Эй кўнгил, сендан ишқ надур, деб сўрасалар, айтгинки, сўраганлар билмагай, билганлар сўрамагай!” - деди дарвеш. – Юкни кўтаришга кўзинг етмаса, унга толиб бўлма.

***

- Сўз сўзламоқнинг қоидаси недир? - сўради Огоҳ.

- Сўз неъматдир, сўз ҳикматдир! - деди дарвеш. - Қоидасини уқиб ол: сўзни сезиб сўзла, эшитганга малол келмасин; сўзни танлаб сўзла, тинглаган маржондек мунтазам десин; сўзни билиб сўзла, кимсанинг қалбига озор етмасин; сўзни ақл тарозисида тортиб сўзла, исрофинг кулфатидан тингловчига ҳам озор етмасин.

Ё Раббано хайр айла, Муҳаммадга ёр айла...

Маъруфжон Йўлдошев