Азер Мусаўғлу

СУКУТ СУРАТИ

Фонийлик сурати

ҳар куни кўрамиз жарбитикларда

инсонларнинг маҳобатли табассумлари сунъий,

йўл четидаги чинорларнинг

кесилган шохларида айлана шикаст,

асфальт устидаги пиёдалар йўлаги -

емирилган чарчоқ ва

бекатдаги қулоқчинли қиз

ҳолатининг танҳолиги

фонийлик фотосурати.

Сукунат сурати

масжидларга киритилмасдан

остонада эгаларин кутган

ковушларнинг туриши ҳорғин,

черков деворларида

фрескаларнинг ранглари сўлғин,

шўх-шаддод болаларнинг чошгоҳ уйқуси,

музлатгичнинг оний сукути,

қабр тошларидаги инсон сурати

ва кўзларидаги фонийлик

фазодан кўринган Ер юзининг маҳобати

сукунат фотосурати.

Умидсизлик сурати

ватанини тарк этмоқ учун

чипта сотиб олган одамнинг

имзосидаги ҳарфларининг эгрилигидаги мажбурият,

ўлимга маҳкумнинг ибодат пайти

ҳар кун тонгда қилган сўнгги нияти,

саратон таҳлилининг жавобини кутаётган одам

сукутида сўнгсизлик, яна

учоқларнинг мовий кўкда қолдирган

оқ изларнинг тез ёйилиб кетиши билан

аёлнинг фарзанд кўриш истагининг йўқолиши

умидсизлик фотосурати.

Ёлғизлик сурати

тонг саҳарлаб тункўйлагида

балконда папирос чекаётган қиз

кўзларида уйқусизлик,

кафеда бир стол нарида ўтирган киши

костюмидаги доғлари сўлғин,

мушуклар тўпланадиган ҳовли

сассизлигида қайғу ва

китоблар орасида икки кишилик чипта

вақти ўтган янгигина

ёлғизликнинг фотосурати.

Чарчоқ сурати

автобусларнинг сариқ рангини қоплаган чанг,

пешойна манекенларининг ҳаракатсизлиги

кекса тиланчи тутган банкадаги бўшлиқ

ва қассоб дўкони соясида ётган итнинг орзуси

чарчоқнинг фотосурати.

***

Башорат

Кинотеатрда “Хатико” фильмини кўраётган аёл

ўрнидан турди ва томошабинга буриб юзини:

Садоқатли бўлмоқ учун, озгина ит бўлинг, одамлар, - деди

ва кўзлари ёшли тарк этилган одам томон кетди.

Мен у ерда эмасдим, аммо биламан буни.

Кесилган дарахт шохидаги қуш инидан

полапонларни олган одам

дарахт кесганларга бурди юзини:

Одамларга фойдали бўлиш учун озгина дарахт бўлинг, - деди

кўзларида ёш, ҳовучини полапонларга ин қилди.

Мен у ерда йўқ эдим, аммо биламан буни.

Метро чиқишида

зиналарга ўтириб тиланаётган чолнинг

олдидаги консерва қутисини бўш кўрган бола

оламонга бурди юзини:

Одам бўлиш учун бироз бола бўлинг, одамлар, - деди

ўйинчоғини чолга берди.

Мен у ерда йўқ эдим, аммо биламан буни.

Сиз энди бу шеърни ўқиб

болалигингизни,

ҳаёт дарахтининг устига тирмашганингизни,

ўша дарахт соясида ётган итингизни эслайсиз

ва ўпкангиз тўлиб дейсиз:

Одамлар, яшамоқ учун озгина хотира бўлинг.
Мен у ерда эмасман, аммо биламан буни.

Маъруфжон Йўлдошев таржимаси