Тўлиной
Тўлиной
табиатнинг тенгсиз гўзалликларидан бири. Ой юзидан пардасини тамом кўтарган
палла. Бутун малоҳату тароватини кўз-кўз қиладиган маҳал. Томошонинг энг
гўзали, энг мафтункори намойиш қилинадиган туннинг оти тўлиной.
Одамзод
бу мусаҳҳар тунда ҳар ишини қўйиб шуълалар рақсини сайр айласа бўлмасмикан, деган хаёл ўтади кўнгилдан бундай чоғларда.
Бироқ,
ойнинг салбий таъсири ҳақидаги ривояту афсоналар шу қадар кўп урчиган-ки,
беихтиёр хотирга келаверади.
Рости,
ой гардишидаги ёғдулар рақсига маҳлиё бўлиб ақлу ҳушидан айрилганлар ҳам кам
эмас. Ойпараст дейишади уларни. Ойга кўп термулмаслик керак дея уқтиришади,
катталар.
Яна
айрим ваҳимачи катталарнинг айтишича, ой тўлган тунда нораста болалар ва
чиройли қизлар кўкка боқмасликлари керак экан. Негаки, гўзалликда танҳо бўлишни
истаган ой уларнинг ёшини, ақлини ва чиройини тортиб оларкан. Шунинг учун у
асло қаримас, кунларни адаштирмас ва чиройини йўқотмас экан.
Бунинг
аксини уқтирадиган эзгу ниятли кексалар ҳам оз эмас. Тўлиной юзидаги пардани
тамоман кўтарган тунда ким унга қараса ва дуо қилса дуолари ижобат бўлишини
қайтаришдан чарчамайдиган бувижонлар озми дунёда?
Қадим
ота-боболаримиз Кўк Тангрига қуллуқ қилган чоғларда энг кўп ибодатни ой тўлган
тунда қилармиш. Бундай пайтда кўкдан ер юзига ёғилган нур ёмғирлари ичида Бўён деган
сеҳрли
ёғду ҳам тушар экан. Бўённи фақатгина қалби тоза ва самимий инсонларгина кўра
олар экан. Бўённи кўрган инсонлар барча эзгу ниятларига эришар эканлар.
Булар
узоқ ўтмишда яшаган ва табиат сирларини ўз тафаккурига яраша очишга уринган
ота-боболаримиздан қолган тасаввурлар холос.
Бутун
салбий ва ижобий тасаввурларни бир ёққа қўйиб табиатнинг муҳташам манзарасини
томошо қилиш фурсатини бой бермаслигингизни тавсия қилардим.
Hiç yorum yok:
Yorum Gönder